د چارچۆڤێ چالاكیێن ئەكادیمی و زانستی یێن بەردەوام دا، و ب مەرەما بهێزكرنا پێگەیێ زانكۆیێ د ناڤەندێن نێڤدەولەتی دا، مامۆستایێن كۆلیژا کارگێری و ئابووری ل زانكۆیا نەورۆز پشكدارى د دویەمین كۆنفرانسێ زانستی یێ هەڤبەش دا كر، یێ كو ل ژێر ناڤ ونیشانێن (ڤەگوهاستنا زانستی د سەردەمێ زیرەكیا دەستكرد دا: دیتنێن هەڤچەرخ بۆ ئاڤاكرنا پەروەردە و فێركرنەكا تەناهی، بەردەوام و ئاست بلند) هاتە ئەنجامدان.
ئەڤ كۆنفرانسە ل رۆژێن 19-20 ئابێ 2026، ل هۆلا سەندیكا ئابووریناسێن كوردستانێ (تاخی دهۆك) و پەیمانگەها ڕەند یا تەكنیكی ب پشكداریا چەندین لایەنێن ئەكادیمی یێن نێڤدەولەتی هاتە برێڤەبرن، ژ وان ژی: زانكۆیا سونان كالیجاكا یا ئیسلامی (ئەندۆنیسیا)، پەیمانگەها ڕەند (هەرێما كوردستانێ)، دەزگەهێ ئەلزەکوات بۆ رەوشەنبیری و هزری (عێراق)، ئەكادیمیا نێڤدەولەتی یا لوبنانی (بەیروت)، و گۆڤارێن زانستی یێن (دی بونو) و (تسنیم).
ژ لایێ خۆ ڤە، كۆلێژا كارگێڕی و ئابووری ل زانكۆیا نەورۆز ب شێوەیەکێ كاریگەر پشكدار بوو، ب رێیا هەر دو مامۆستایێن خودان ئەزموون (د. عدنان احمد محمد) و (د. اكرم صالح یوسف)، یێن كو وەك بڕێڤەبەرێن روینشتنێن زانستی یێن كۆنفرانسی رۆلەكێ بەرچاڤ گێڕای.
كۆنفرانسی تیشك خستە سەر دوماهیك پێشهات و داهێنانێن زیرەكیا دەستكرد (Artificial Intelligence) د سیستەمێ فێركرنێ دا، و چەوانیا بكارئینانا ڤان تەكنەلۆژیایان ژ لایێ مامۆستا و قوتابیان ڤە بۆ بلندكرنا ئاستێ زانستی و لێكۆلینێ. پشكداریا زانكۆیا نەورۆز د ڤان چالاكیێن نێڤدەولەتی دا، پێنگاڤەكا گرنگە بۆ بلندكرنا ئاستێ زانكۆیێ د ڕێزبەندیا جیهانی یا (Webometrics) دا و نیشاندانا شیانێن زانستی یێن مامۆستایێن وێ د ئاستێ نێڤدەولەتی دا.
