ڕۆژا سێشەمبی ڕێکەفتی ١٧ـی چریا دووێ ٢٠٢٦ێ، قوتابیێن قۆناغا سێیێ یێن بەشێ ئەندازیاریا شارستانی ل زانکۆیا نەورۆز شیان پلەیا سێیێ د پێشبڕکێیا هێز و خۆڕاگرییا پران دا بناڤێ "Popsicle Stick Bridge Competition" بدەستڤهبینن، ئەوا ل هۆلا پشکا زانست ل زانکۆیا زاخۆ ب پشکدارییا چەندین گروپێن قوتابیێن زانکۆیێن جودا جودا هاتییە ئەنجامدان. ئەڤ چالاکییە ب هەڤکاری دگەل چاپتەرێ قوتابییێن کۆمەلگەها کۆنکرێتا ئەمریکی (American Concrete Institute - ACI) هاتبوو ڕێکخستن. د ڤێ پێشبڕکێیێ دا، سەرۆکێ بەشێ ئەندازیاریا شارستانی ل زانکۆیا نەورۆز، پڕۆفیسۆر د. سالم طیب یوسف، وەک ئەندامەکێ لێژنا دادوەرییێ پشکدار بوو.
تیمێ سەرکەفتی یێ زانکۆیا نەورۆز کو ژ قوتابیان (زانا کەمال، ئارام سەلام، و ئاڤا تێلی) پێکهاتبوو، ب سەرپەرشتییا مامۆستا (مەتین ئیبراهیم)، پرەک ل سەر شێوازێ (Double-intersection Warren truss with vertical members) دیزاین و دروست کربوو. ئەڤ پرە ب درێژاهییا ٦٥.١ سم، فرەهییا ١٣.٣ سم، و بلنداهییا ١٣.٣ سم، بتنێ ژ دارکێن بەستەنییێ و چەسپێ سپی هاتبوو چێکرن. دیزاینا وان ب هێز و جێگیرییا خۆ و دابەشکرنا ڕێکخستی یا قورساییێ ب سەر ستوون و پارچەیێن پرێ دا دیار بوو، کو شییا بەرگەیا قورساییەکا مەزن بگریت دگەل پێگیریکرنەکا تمام ب ڕێنمایێن توند یێن پێشبڕکێیێ دەربارەی قەبارەی و کێشێ (کو دڤییا ژ ٤٥٠ گرامان زێدەتر نەبیت).
ئەڤ سەرکەفتنە نیشانا شیانێن بلند یێن قوتابیێن زانکۆیا نەورۆزە د وەرگێڕانا زانینا تیۆری یا ناڤ هۆلێن خواندنێ بۆ چارەسەریێن ئەندازیاری یێن پراکتیکی و ورد. ب ڕێکا تێکەڵکرنا زانستی و شارەزاییێن دەستی، قوتابیێن مە بەردەوامن ل سەر داهێنان و تۆمارکرنا ئەنجامێن گەش د کۆڕبەند و پێشبڕکێیێن زانکۆیان دا.