سەرۆکێ زانكۆیا نەورۆز و باليۆزخانەیا عیراقێ ل واشنتۆن دەليڤەیێن هەڤكاریێ دگەل زانكۆیێن ئەمریكی گەنگەشە دكەن

د چارچووڤەیێ پشكداریا خۆ دا د كۆنفرانسێ نافسا 2026 دا، كو مەزنترین كۆنفرانسێ نێڤدەولەتی یێ خواندنا بلند و ئالوگۆرا ئەكادیمی یە ل جیهانێ و ل وەلاتێن ئێكگرتی یێن ئەمریكا دهێتە ئەنجامدان، سەرۆكێ زانكۆیا نەورۆز، پ. هـ. د. مێڤان عارف عەبدولرەحمان، سەرەدانا باليۆزخانەیا كۆمارا عیراقێ ل واشنتۆن دیسی كر و دگەل د. دورەید مەحموود عەلی عەباس، وەزیرێ موفەوەز و جێگرێ سەرۆكێ هناردەیێ كۆم بوو. هەروەسا دگەل نوینەرێن نڤیسینگەها رەوشەنبیری یا عیراقی، د. عەلاء ئەلحوسێنی، جێگرێ پاشكۆیێ رەوشەنبیری، و د. حسێن ئەلشێخ، رێڤەبەرێ كارگێری كۆم بوو.

د کۆمبوونێ دا هندەك مژارێن گرێدای ب خواندنا بلند هاتنە گەنگەشەكرن، و باس ل ئاسۆیێن هەڤكاریا ئەكادیمی د ناڤبەرا زانكۆیێن ئەمریكی و زانكۆیێن هەرێما كوردستانێ ب گشتی و زانكۆیێن ئەهلی ب تایبەتی هاتە كرن. هەروەسا باس ل رۆلێ باليۆزخانەیا عیراقێ و نڤیسینگەها رەوشەنبیری هاتە كرن بۆ ئاسانكاری و بهێزكرنا ڤێ هەڤكاریێ ب شێوەیەكی كو خزمەتا دەزگەهێن خواندنا بلند ل هەرێما كوردستانێ و عیراقێ بكەت.

هەروەسا د گەنگەشەیان دا باس ل دەليڤەیێن دروستكرنا هەڤپشكیێن ئەكادیمی د ناڤبەرا زانكۆیا نەورۆز و زانكۆیێن ئەمریكی دا هاتە كرن، ژ وان ژی بەرنامەیێن راهێنانێ و ئالوگۆرا ئەكادیمی، و دابینكرنا دەليڤەیێن خواندنا بلند بۆ قوتابی و دەرچوویێن زانكۆیێ، زێدەباری لێكۆلینا میكانیزمێن هەڤكاریێ د وارێن ڤەكۆلینێن زانستی و وارێن دی یێن هەڤپشك دا.

پشكداران جەخت ل سەر گرنگیا بەردەوامیا پەیوەندی و هەماهەنگیێ د قووناغا بهێت دا كر، ژ پێخەمەت گوهۆرینا ڤان گەنگەشەيان بۆ دەستپێشخەریێن كرداری و هەڤپشكیێن بەردەوام، دا كو ببیتە ئەگەرێ بەرفرەهكرنا پەیوەندیێن ئەكادیمی یێن نێڤدەولەتی یێن زانكۆیا نەورۆز و ڤەكرنا ئاسۆیێن نوی ل پێشیا قوتابی و مامۆستایێن وێ.

ئەڤ سەرەدانە د چارچووڤەیێ بزاڤێن بەردەوام یێن زانكۆیا نەورۆز دا دهێت بۆ بێهێزكرنا پێگەهێ خۆ یێ نێڤدەولەتی و ئاڤاكرنا هەڤپشكیێن ستراتیژی دگەل دەزگەهێن ئەكادیمی و پەروەردەیی یێن ناڤدار ل جیهانێ، هەڤتەریب دگەل دیتنا زانكۆیێ بۆ پێشئێخستنا خواندنا بلند و ڤەكرنا بیاڤێ هەڤكاریا ئەكادیمی ل سەر ئاستێ نێڤدەولەتی.