سەرۆكێ زانكۆیا نەورۆز بۆ كەنالێ ڕووداو: ئەم بزاڤێ دكەین پێگەهێ زانكۆیێن كوردستانێ ل سەر ئاستێ ناڤدەولەتی پێشبێخین و دەلیڤەیێن خاندنێ ل ئەمریكا بۆ قوتابیان پەیدا بكەین.

د چارچووڤەیێ پشكداریا خۆ دا د كۆنفرانسێ ناڤدەولەتی یێ (NAFSA)یێ بۆ پەروەردە و ئالۆگۆرا ئەكادیمی، كو ئێكە ژ گرنگترین چالاكیێن جیهانی د وارێ خاندنا بلند و هه‌ڤكاریا ئەكادیمی یا ناڤدەولەتی دا، سەرۆكێ زانكۆیا نەورۆز (پ. هـ. د. مێڤان عارف عەبدولرەحمان) د هەڤدیتنەكێ دا دگەل كەنالێ ئاسمانی یێ رووداو، بەحسی گرنگیا پشكداریا زانكۆیێن هەرێما كوردستانێ د خرڤەبوونێن ئەكادیمی یێن ناڤدەولەتی دا كر.

سەرۆكێ زانكۆیێ دوپات كر كو زانكۆیا نەورۆز ب رێیا پشكداریا خۆ د كۆنفرانسێ NAFSA دا، بزاڤێ دكەت هەبوونا زانكۆیێن هەرێما كوردستانێ ل سەر گۆرەپانا ئەكادیمی یا جیهانی بهێزتر لێ بكەت، و ئاماژە ب گرنگیا ئاڤاكرنا پەیوەندی و هەڤپشكیێن ئەكادیمی دگەل زانكۆ و سازیێن پەروەردەیی یێن ناڤدەولەتی كر، ب وی رەنگێ كو پشكدار بیت د پێشخستنا كەرتێ خواندنا بلند ل هەرێمێ دا.

د ڤێ دەربارێ دا، سەرۆكێ زانكۆیێ گۆت: "ئەم بزاڤێ دكەین هەبوونا زانكۆیێن هەرێما كوردستانێ د كۆنفرانسا NAFSA و ل سەر ئاستێ ئەكادیمی یێ ناڤدەولەتی بچەسپێنین."

هەروەسا دیار كر كو زانكۆیا نەورۆز ل سەر بزاڤێن خۆ بەردەوامە بۆ بەرفرەهكرنا ئاسۆیێن هەڤكاریا ئەكادیمی یا ناڤدەولەتی و پەیداكرنا دەلیڤەیێن زێدەتر یێن خواندنێ بۆ قوتابیان، و دوپات كر كو زانكۆ كاردكەت بۆ پشتەڤانیكرنا وان دەسپێشخەریێن كو دەلیڤێ ددەنە قوتابیان دا كو مفا ژ بەرنامەیێن ئالۆگۆرا ئەكادیمی و خاندنا ل دەرڤەی وەلاتی وەربگرن.

و زێدەتر گۆت: "ئەم بزاڤان دكەین بۆ ڤەكرنا ئاسۆیێن نوی ل پێشیا قوتابیێن مە دا كو بەردەوامیێ بدەنە خواندنا خۆ ل وەلاتێن ئێكگرتی یێن ئەمریكا."

پشكداریا زانكۆیا نەورۆز د كۆنفرانسێ NAFSA دا د چارچووڤەیێ ستراتیژیەتا وێ دا دهێت، كو ئارمانجا وێ بهێزكرنا هەڤكاریا ناڤدەولەتی، و گەشەپێدانا هەڤپشكیێن ئەكادیمی، و پەیداكرنا دەلیڤەیێن خواندنێ یێن بەرفرەهترە بۆ قوتابی و ڤەكۆلەران، ب شێوەیەكی كو دگەل پێشڤەچوونێن جیهانی د وارێ خواندنا بلند دا بگونجیت.