سەرۆکێ زانکۆیا نەورۆز دگەل بەرپرسەکا نڤیسینگەها کاروبارێن پەروەردەیی و رەوشەنبیری یا وەزارەتا دەرڤە یا ئەمریکا کۆمبوو

وەک پشکەک ژ دیدار و چالاکیێن وی د ماوەیێ کۆنفرانس و پێشانگەها نێڤدەولەتیا NAFSA دا، کو نوکە ل باژێرێ ئورلاندو ل ویلایەتا فلوریدا ل ئەمریکا دهێتە ئەنجامدان، پ.هـ. د. مێڤان عارف عەبدولرەحمان، سەرۆکێ زانکۆیا نەورۆز، دگەل خاتوون "رۆزی ئێدموند" (Rosie L. Edmond)، بەرپرسا پرۆگرامان ل (EducationUSA)، یا سەر ب نڤیسینگەها کاروبارێن پەروەردەیی و رەوشەنبیری ل وەزارەتا دەرڤە یا ویلایەتێن ئێکگرتیێن ئەمریکا کۆمبوو.

د دیدار خۆ دا، هەردو لایەنان بیر و بۆچوونێن خۆ ل سەر دەلیڤەیێن هەڤکاریا ئەکادیمی و پەروەردەیی لێک گوهۆرین، و گەنگەشە ل سەر ئاسۆیێن بهێزکرنا پەیوەندیێن ئەکادیمی یێن ناڤدەولەتی و بەرنامەیێن ئالۆگۆرا پەروەردەیی و خواندنا بلند کر. هەروەسا بەحسی رێکێن پێشئێخستنا هەبوونا ئەکادیمی یا زانکۆیا نەورۆز ل سەر ئاستێ ناڤدەولەتی و بەرفرەهکرنا هەڤکاریێ دگەل دەزگەهێن پەروەردەیی و ئەکادیمی یێن ئەمریکی هاتەکرن.

رێکخراوا (EducationUSA) تۆرەکا پەروەردەیی یە و سەر ب نڤیسینگەها کاروبارێن پەروەردەیی و رەوشەنبیری یە ل وەزارەتا دەرڤە یا ئەمریکا، کو رێنمایی و زانیاریان ل دۆر دەلیڤەیێن خواندنێ و ئالۆگۆرا ئەکادیمی ل ویلایەتێن ئێکگرتیێن ئەمریکا پێشکێش دکەت.