سەرۆکێ زانکۆیا نەورۆز پشکداریێ د کۆنفرانسێ ناڤدەولەتیێ NAFSA دا ل باژێرێ ئورلاندو ل ویلایەتا فلوریدا ل ئەمریکا دکەت

سەرۆکێ زانکۆیا نەورۆز، پ. هـ. د. مێڤان عارف عەبدولرەحمان، پشکداریێ د کارێن کۆنفرانسێ نێڤدەولەتیێ NAFSA یێ بۆ خواندن و ئالۆگۆرا ئەکادیمی دا دکەت، کو نوکە ل باژێرێ ئورلاندو ل ویلایەتا فلوریدا ل وەلاتێ ئەمریکا دهێتە ئەنجامدان، ب پشکداریا هەژمارەکا زۆرا زانکۆ و دەزگەهێن ئەکادیمی ژ وەلاتێن جودا جودا یێن جیهانێ.

پشکداریا سەرۆکێ زانکۆیا نەورۆز د ڤی بوونەیا ناڤدەولەتی یا گرنگ دا، رەنگڤەدانا بزاڤێن بەردەوامێن زانکۆیێ یە بۆ بهێزکرنا هەبوونا خۆ یا ئەکادیمی ل سەر ئاستێ جیهانێ و بەرفرەهکرنا هەڤکاریا زانستی و رەوشەنبیری دگەل زانکۆ و دەزگەهێن خواندنێ یێن ناڤدەولەتی، زێدەباری ئاگەهداربوون ل سەر نویترین پێشڤەچوونێن خواندنا بلند و هەڤکاریا ئەکادیمی یا ناڤدەولەتی.

د پەراوێزا کۆمبوونێن خۆ دا د کۆنفرانسی دا، سەرۆکێ زانکۆیێ دگەل خاتوون "فانتا ئاو" (Fanta Aw)، رێڤەبەرا جێبەجێکار و سەرۆکا جێبەجێکارا رێکخراوا NAFSA کۆمبوو، و تێدا جەخت ل سەر گرنگیا ب هێزکرنا هەڤکاریا ئەکادیمی یا ناڤدەولەتی و پێشئێخستنا هەڤپشکیان د ناڤبەرا زانکۆ و دەزگەهێن خواندنێ دا ل سەرانسەری جیهانێ کر.

جهێ ئاماژەپێکرنێ یە کو کۆنفرانسێ NAFSA ب ئێک ژ مەزنترین رویدانێن ناڤدەولەتی یێن تایبەت ب خواندنا بلند و ئالۆگۆرا ئەکادیمی دهێتە هەژمارتن، کو سالانە ب هزاران ئەکادیمی، شارەزا و نوینەرێن دەزگەهێن خواندنێ ژ هەمی جیهانێ کۆم دکەت.