ل رۆژا پێجشەمبێ رێكەفتی (26/10/2023) ل دەمژمێر (5:00) ئێڤاری، د رێورەسمەكێ تایبەتدا و ب ئامادەبوونا نوینەرێن وەزیرێ خواندنا بلند و ڤەكۆلینێن زانستی، سەرۆكێن زانكۆیان و بەرپرسێن دامودەزگەهێن حكومی و كەرتی تایبەت و سازیێن ڕاگەهاندنێ، ئاهەنگا گەڕا 17 یا دەرچوونا قوتابیێن زانكۆیا نەورۆز هاتە گێران.
ل دەستپێكێ پ. د. عەبدولوەهاب خالد مووسا سەرۆكێ زانكۆیێ پەیڤەك پێشكێشكر و داخوازا پاشەڕۆژەكا گەش و كارا بۆ دەرچوویان كر، كو ل سازیێن حكومی و كەرتێ تایبەت خزمەتا گەل و نشتمانێ خۆ بكەن. هەروەسا، ب هویر ئاماژە ب پرۆسێسا پێشكەفتنا زانكۆیا نەورۆز و ڕێزبەندیا زانكۆیێ ل سەر ئاستێ ناڤخۆیی و دەرڤەیی وەلاتی دا. ژ لایێ خۆ ڤە نوینەرێ پارێزگارێ دهۆكێ بەرێز ماجد سەید سالح پەیڤا پارێزگەها دهۆكێ پێشكێشكر و داخوازا بەردەوامی و سەركەفتنێ بۆ دەرچوویێن زانكۆیا نەورۆز كر. ل دویڤدا نوینەرێ وەزیرێ خواندنا بلند و ڤەكۆلینێن زانستی پەیڤا وەزارەتێ خواند و پیرۆزباهی ل دەرچوویێن گەڕا 17 كر. ل دووماهیێ ژی، پەیڤا قوتابیێن دەرچووی ژ لایێ قوتابیا دەرچووی پەیڤین نەسرەت ڤە هاتە گۆتن.
هەروەسا د ناڤ بڕگەیێن ئاهەنگێدا قوتابیێن سەركەفتیێن ئێكێ ل سەر پشكێن خواندنێ ژ لایێ سەرۆكێ زانكۆیێڤە هاتنە خەلاتكرن. دیسان سەرۆكێ جڤاتا ئەمینداران 7 مامۆستایێن زانكۆیا نەورۆز یێن باوەرنامەیێن بلند ل سالا بووری ب دەستخۆڤەئیناین خەلاتكرن.
ل دووماهیێ، قوتابیێن دەرچووی ئێك ب ئێك ل سەر ستەیجێ ئاهەنگێ باوەرنامەیێن دەرچوونێ ژ سەرۆكێ زانكۆیێ وەرگرتن و ب ئاهەنگەكا تایبەت و ب شاهی و دیلان، رێورەسمێن ئاهەنگا گەڕا 17 ب دووماهیك هاتن.