مامۆستایێ کۆلیژا زمانان ل زانکۆیا نەورۆز، د. یاسر حەسەن عەلی، دێ پشکداریێ د کۆنفرانسێ نێڤدەولەتی یێ ڤەکۆلینێن کوردی دا کەت، یێ کو ژ لایێ کۆلیژا لەندەن یا زانستێن ئابووری و سیاسی (LSE) ل باژێرێ لەندەن ل وەلاتێ بریتانیا دێ هێتە سازکرن. ئەڤ کۆنفرانسە دێ د ناڤبەرا ٢٩ێ نیسانێ تا ١ێ گولانا ٢٠٢٦ێ ب پشکداریا هەژمارەکا مەزن یا ڤەکۆلەر و ئەکادیمیێن زانکۆ و دەزگەهێن جیهانی هێتە ئەنجامدان.
د. یاسر حەسەن عەلی، کو هەڤدەم مامۆستایە ل زانکۆیا دهۆکێ ژی، دێ ڤەکۆلینەکا زانستی ب ناڤونیشانێن:
"Decentring Sorani Kurdish in Iraq: The Rise of Bahdinani in Translation" (ژسەنتەرخستنا کوردیا سۆرانی ل ئیراقێ: سەرهلدانا بەهدینیێ د وەرگێرانێ دا) پێشکێش کەت. ئەڤ ڤەکۆلینە ل سەر گۆهۆرینێن کولتووری و زمانڤانی ل هەرێما کوردستانێ رادوەستیت، ب تایبەتی ژی تیشکێ دئێخیتە سەر رۆلێ وەرگێرانا کوردی یا بەهدینی و کارتێکرنا وێ ل سەر دوبارە دارشتنا دینامیکێن زمانڤانی و کولتووری د ناڤ گۆتارا ئەدەبیا کوردی دا.
ئەڤ پشکداریە نیشانا پێگیریا زانکۆیا نەورۆزە بۆ ب هێزکرنا پێگەهێ خۆ یێ ئەکادیمی د ئاستێ نێڤدەولەتی دا و بەرفرەهکرنا هەماهنگیێ دگەل ناڤەندێن زانستی یێن جیهانی.
