زانکۆیا نەورۆز پشکداری هەلمەتا جیهانی یا Ecosia دبیت بۆ بلندکرنا هشیاریا ژینگەهی

د چارچووڤەیێ بزاڤێن خۆ دا بۆ بلندکرنا هشیاریا ژینگەهی و بەلاڤکرنا کەلتوورێ بەردەوامیێ د ناڤبەرا قوتابی، مامۆستا و فەرمانبەران دا، زانکۆیا نەورۆز پشکداری هەلمەتا جیهانی یا Ecosia بوو. ئارمانج ژ ڤێ پێنگاڤێ هاندانا جڤاکێ زانکۆیێ یە دا کو ب رێکا بکارئینانا رۆژانە یا تەکنۆلۆجیایێ ببنە پشکەک ژ پاراستنا ژینگەهێ و پشتەڤانیکرنا پرۆژەیێن چاندنا داران.

د ناڤ بەرنامەیێ ڤێ هەلمەتێ دا، رێڤەبەریا ساخلەمی و سلامەتیێ ل سەرۆکاتیا زانکۆیا نەورۆز ب هەڤکاری دگەل  Ecosia، دێ رابیت ب رێکخستنا زنجیرەکا سمینار و چالاکیێن هشیاریێ د ناڤ زانکۆیێ دا، کو مامۆستا، قوتابی و لیژنێن ساخلەمی و سلامەتیێ ل کۆلێژێن جودا جودا ب خۆڤە بگریت. ئەڤ چالاکیە دێ بەحسی گرنگیا دارچاندنێ، پاراستنا ژینگەهێ و کێمکرنا شوینپەنجەیا کاربۆنی، زێدەباری نیشاندانا ڤێ چەندێ کا چاوا ئەندامێن زانکۆیێ دشێن ب رێکا بکارئینانا بزوێنەرێ گەریانێ یێ Ecosia پشتەڤانیا پرۆژەیێن ژینگەهی بکەن.

هەروەسا زانکۆ دێ کار کەت بۆ بەلاڤکرنا ڤێ هەلمەتێ د ناڤ کەمپۆسا زانکۆیێ دا و ب رێکا پلاتفۆرمێن خۆ یێن دیجیتال و تۆرێن جڤاکی، دگەل دابینکرنا کۆدێن QR دا کو گەهشتنا قوتابی و ئەندامێن زانکۆیێ بۆ سەر پلاتفۆرمێ ب ساناهیتر ببت و بشێن ب ئاسانی پشکداریێ د ڤێ دەستپێشخەریێ دا بکەن.

دهێتە زانین کو Ecosia بزوێنەرەکێ گەریانێ (Search Engine) یە کو قازانجێن خۆ بۆ کارێن کەشوهەوای تەرخان دکەت، ب تایبەتی پشتەڤانیکرنا پرۆژەیێن چاندنا داران و ڤەگەراندنا هەڤسەنگیا سیستەمێن ژینگەهی د دەڤەرێن جودا جودایێن جیهانێ دا.

پشکداریکرنا زانکۆیا نەورۆز د ڤێ هەلمەتێ دا ل ژێر دروشمێ “تو ژی دارەکێ ب ناڤێ کوردستانێ بچینە!” هاتیە، وەک پشکەک ژ ئاراستەیا وێ بەرەڤ بهێزکرنا بەرپرسیارەتیا ژینگەهی و گوهۆرینا هشیاریا بەردەوامیێ بۆ کریارێن مەیدانی دا، کو هەمی ئەندامێن جڤاکێ زانکۆیێ تێدا پشکدار ببن.